الأربعاء، 23 نوفمبر، 2011

اكتبي شهادة وفاتي

اكتبي شهادة وفاتي
واعلني تاريخ مماتي

يوم ما آمن للي خان
وارتمي في حضن الجبان
يوم ما أهرب م الميدان
والتمس شط الآمان
جوه حضن اللي خانوكي
...

اكتبي شهادة وفاتي
واعلني تاريخ مماتي

يوم ما أبيعك لأجل كرسي
يوم ما أنسي او انت تنسي
إن فيه أطهار فدوكي
وإن فيه اندال فاتوكي
واقفة وحدك في الميدان
...

اكتبي شهادة وفاتي
واعلني تاريخ مماتي

يوم ما اسلم للي باع
يوم ما افوتك للضياع
وابقي واحد م الضباع
اللي عايزين ينهشوكي


...

أبـوذكري
22-11-2011

الأربعاء، 9 نوفمبر، 2011

قالـوا هذا العيــد :

الجـــزار: إمـا أنا أو الفـــروة:))
الخــروف: وإنــه ليحــز في فروتي ما الاقيه من جـزارين حتتي:)))
شفيـق: أنا دبحت واندبحت وماتلبسليش صوف الوطنية:)))
سليمان: الخرفان غير جاهزة للدبح:))
البرادعي: مش هندبح تاني يامني:))
الاسواني: كلهم أبـوفروة:))
العيسوي: ماعندناش خرفان:))
مرتضي: سيديهات الخرفان كلها عندي:))
عكاشة: لو عرفت فروة الخروف فيها كام شعراية حانتخبك رئيس جمهورية يابرادعي:))
بكري: ارجوكم ارجعوا وسيبوا الخروف يكمل علفته:)) 
خالد صلاح: كلـمة واحـدة: مـــااااااااااااااء:))
يعقوب: في موقعة الأضحية.. قالــت الخرفان للجزار: نعـم، السلخانة سلخانتنا.. واللي مش عاجبه يروح يندبح في كندا :))
حسان: أقسم وأنا ارتدى الآن ملابس الإحرام ان العيش هو اللي حمي الفتة:))
السلمي: المعترضون ع الفتـة الفوق دستورية التي قمت بإعدادها مالهمش في الطبيييخ:))
عمرو مصطفي: يعني ايه "مأ مأ مين قدك؟"..عايز تقول ايه ياعدوي؟!! حاتلاعبني بالخرفان حالاعبك، انا حيوان وبافهم لغة المعيز كويس:))
تـامر من غمرة: السلخانة مليانة خرفان اجانب.. وبيتكلموا انجلش لانجودج كويس.. وبيقولوا "واتر" .."واتر":((
عادل إمام: عمل ايه الخروف عشان يندبح:))
طلعت زكريا: مايحدث في السلخانة دبح وسلخ وعلاقات جنسية كاملة:))
...
أبوذكري ..
9 / 11 / 2011

الثلاثاء، 8 نوفمبر، 2011

خروف ميت م الخوف

العيـد فرحــة..
ضحى بأرنب ولا بفرخـة
فكك منى وسيبنى اعيـش
طنش مرة وماتضحيــش
اعتقنــي و لاتـدبحنيــش
طـــب استنى.. 
ركــز حبـــه..
و
فتح عينك يااعمى وشـوف
انا لاخروف ولاده صـوف
انا بنـــي آدم زيـــه زيــك
بـص التقى قدامــه حلوف
طايح فيها ومش مكسوف
فاكـر إن دا شـئ مألـوف
و
الحلـــوف مــــش بيشــــوف
والبنى آدم  مااااات م الخوف
نــام مهمـــوم..
صوته مكتوم..
قـام م النــوم..
بــص التقـى 
شـــاف نفســــــه خروف
بعد ماكان للنور ملهــوف
فضل يبقى يعيش مكتوف
ألا يلاقى روحه محـدوف
ولا يشوف صوفه منتوف
....
فتح عينك يااعمى وشــوف
انا لاخروف ولا ده صوف

انا بنـــــــــــــــــي آاااااااادم..
ميـــت م الخــووووووووف..
-------------------------
(محمد أبوذكرى)..
11 نوفمبر، 2010‏

الخميس، 21 يوليو، 2011

خـــاطر الشهيـد سليمان

لا اعـرف!!
إذا كانت القصيدة التالية قد سُربت من محبس الشهيد سليمان خاطر..
ام..
أنها للشاعر أحمد فؤاد نجم
كل ما اعرفـه!!
انى اعشق هذا الشهيد
وارجو من الله.. ان انال شرف الشهادة ـ مثلـه ـ في سبيل الوطن.. وان  يجمعنى به الله في الجنة..
  .. .. ..
يقــول نجم علي لسان الشهيـد:
أو
يقــول الشهيـد:

أضمك وجرحي
بينزف قُبل
برغم اللي خانوا
ورغم اللي هانوا
ورغم اللي كانوا
  في غاية الخجل
أضمك وحتما يدور العجل
بكل الأراضي
اللي خُضرة وحبل
مادام لسه بغزل
حروف الغزل
وبنسج غرامي قصيدة
و كلامي بينقش أسامي
بحجم الدبل
 ح اضُمّك
وبحلم بحضنك وبيت
أنا اللي بليلك وطَميِك حييت
وضيعت عمري
ولا كنت أدري
ولو كنت أدري مكنتش بقيت
على أي صهيوني أول ما جيت
خصيمك نبينا في يوم الحساب 
إذا ما التقيتي بهذا الكتاب
ولم تبدأي
ولم تعشقي
ولم تلحقي
حتى لو بالحجارة
ونركب قفاهم بشارع وحارة
ما بين الآثار
وجوه الديار
بأرض المطار
أو بمبنى السفارة
و آخر كتابي
أيا مهجتي
أمانة ما يمشي
ورا جثتي
سوى المتهومين بالوطن-
تهمتي
فداكي بدمايا يااللي شاغلة الخواطر
بطول الزمان


ملحوظة:
قرأت في أحد الأماكن أنـه على أثـر الحادث:
ــ (الذى قتل فيه الشهيد 7 إسرائيليين لم يستجيبوا لتحذيراته بإطلاقه النار في الهواء حيث كانوا يريدون تجاوز الحدود المصرية ــ التى كان مكلفا بحراستها ــ بدون ترخيص ) ــ
صــرح الرئيس المخلوع مبارك أنه  في غاية الخجل لما حدث!!!!!!!
  • ومن مفارقات القدر أن سليمان خاطر استشهد في شهر "يناير" وتحديدا في يوم  7 يناير1986..نفس الشهر الذي شهد قيام الثورة المجيدة التى أسقطت مبارك و نظامه العميل..
  • حاول النظام  العميل تصوير الشهيد علي أنه مختل عقليا وجاء فى التقرير النفسي الخاص به والذي كتب بعد الحادث "أن الظلام يحول مخاوفه إلى أشكال أسطورية خرافية مرعبة تجعله يقفز من الفراش فى فزع" ..واستند التقرير الي معايشة الشهيد  لمجزرة بحر البقر و مشاهدته بعينيه الأطفال تقصفهم الطائرات الإسرائيلية فى  جريمتها الأشهر بمدرسة بحر البقر حيث لم يكن عمره قد تعدي الـ9سنوات..
  • ولم يكتف النظام الخائن بذلك بل حاول تصوير حادث اغتياله داخل محبسه علي أنه انتحار..
  • ولكن تظل كلمات الشهيد بعد محاكمته الظالمة (على أداء واجبه) وصدور الحكم عليه بالسجن المؤبد..دليلا علي إجرام النظام وتواطؤه في قتل الشهيد ..حيث علق الشهيد علي الحكم قائلاً:
"أنا لا أخشى الموت ولا أرهبه فهو قضاء الله وقدره، لكنى أخشى أن يؤثر الحكم على زملائى ويصيبهم بالخوف ويقتل فيهم وطنيتهم"...
فلتهدأ روحك يـا سليمان !!
ربنــا جبر بخاطـرك ياشهيد !!
وأنتقــم لـك من القتلـة !!
 أبوذكري
18/ 4/ 2011
المعلومات في الملحوظة فى آخر القصيدة.. بتصرف منى نقلا عن بعض المواقع..

الأحد، 17 يوليو، 2011

دعوة عامة- و - مسيرة لرد الجميل !!

أعجبتني كثيرا الدعوات التي ظهرت في الآونة الأخيرة لتكريم الرئيس السابق.!!. والدعوات لمسيرات تحت عنوان "رد الجميل"..
و اري ان هذا اقل مايجب تقديمه لشخص قضي 30 عاما من عمره رأينا فيها علي يديه الكثير مما يعجز اللسان عن وصفه، وفعل معنا وفينا الكثير والكثير مما يستوجب منا ان نكون اوفياء معه ونكرمه كما ينبغي (وعلي قدر مارأينا منه وقدر مافعل معنا وفينا)!! علنا نستطيع ان نرد له ولو جزء ضئيل جداً جدا من افضاله وخيره السابق علينا .!!.

وبناء عليه!!
أقدم هذه الدعوة العامة:

  • لكل عائلة فقدت ابنا من ابناءها او  قريبا لها غرقا في عبارة، او في مركب من مراكب الهجرة الغير الشرعية،  او احتراقا في قطار او في انفجار كنيسة من الكنائس .. ولكل أسره مات فرد من افرادها بالسرطان او الفشل الكبدي او الكلوي جراء ماتناوله من مياه ملوثة وغذاء فاسد - في عهد الرئيس السابق..
  • ولكل عائلة فقدت عائلها -في عهد الرئيس السابق -نتيجة انتحاره لعجزه عن توفير حياة كريمة لأسرته ولعدم قدرته علي الوفاء بمتطلبات ابنائه نتيجة ضيق ذات اليد وارتفاع الأسعار وجشع التجار وطمع رجال الأعمال الذين لم يكن يعنيهم سوي تحصيل المكاسب ولم يجدوا يوما من الأيام سلطة أو حاكم يقف لهم او يردعهم حتي يرأفوا بحال الفقراء من رعيته والذين سيسأل عنهم امام الله يوم القيامة..
  • ولكل اسرة انتحر ابن من ابناءها بعد ان افني عمره في تحصيل  العلم والحصول علي الشهادات العلمية، و تخرج فلم يجد وظيفة أو عملا شريفا يوفر له دخلا يكفل له حياة كريمة يشعر معها انه انسان له قيمة في الحياة وليس مجرد عائل وعبء علي اسرته..
  • ولكل شاب تقدم - في عهد الرئيس السابق- لإحدي الكليات العسكريه ، او احدي الوظائف المرموقة واجتاز كل الاختبارات المؤهلة بنجاح، ولم يتم قبوله بحجة انه (غير لائق اجتماعيا) في مجتمع يُفترض انه لايعترف بالفوارق الطبقيه، ودائما ماكان يدعي حاكمه أن جميع مواطنينه سواء في الحقوق والواجبات ..
  • ولكل باحث أوعالم أو استاذ جامعي وكل صاحب فكر هاجر خارج البلاد -في عهد الرئيس السابق -فرارا من الروتين والعقليات المتحجرة بعد أن يأس من أن يجد من يستمع اليه او يأخذ بأفكاره..
  • ولكل صحفي او اعلامي او اديب اضير في عمله أو فقد وظيفته ومنع من ممارستها ولوحق بالقضايا والاتهامات الباطلة بسبب رأي مخالف او معارض -في عهد الرئيس السابق..
  • ولكل موظف او عامل اضير في عمله أو فقد وظيفته نتيجة كشفه عن فساد أو نتيجة محاولته لايقاف الفساد ومجابهته في مكان عمله، ولكل من اضير من أحد الفاسدين الذي بلغ فسادهم للركب -في عصر الرئيس السابق- بتعبير ذراعه الأيمن وكاتم اسراره
  • ولجميــع الأشخاص الذين تم استضافتهم يوما من الايام - (بدون وجه حق)- داخل مقر من مقار آمن الدولة، أو داخل المعتقلات، أو في أقسام الشرطة..في عهد الرئيس السابق.!.

أدعـــو !!! كل هؤلاء الأشخاص أن يخرجوا جميعا في مسيرة لــ((رد الجميل)) للرئيس السابق.!. والمطالبه بتكريمه بنفس الطريقة التي كرموا بها في عهده ...!!....

وأنا متأكد أن هذه  المسيرة ستكون مسيرة مليونية.!!. 
تفوق في عددها مسيرات القلة المندسة والعملاء بتوع التحرير..!!.. 

     (أبوذكري)
20 / 2 / 2011

الثلاثاء، 28 يونيو، 2011

معانا القلم أبو سن ناعم

معانا القلم أبو سن ناعم
كلامه نواعم
وناصح وفاهم
بترفض يوافق
تعارض ينافق
معانا القلم أبو سن ناعم

حنين ولين
مهاود وهين
بيكتب ويرسم
ويمضى ويبصم
ويقبض ويقسم
معانا القلم أبو سن ناعم

بيكتب وانت صاحى
ويكتب وانت نايم
بيكتب وانت قاعد
ويكتب وانت قايم
معانا القلم أبو سن ناعم

معانا الحقيقة لذيذة ورقيقة
 ماتجرحش أحداً
معانا الجريمة شقية وبريئة
ماتفضحش أبداً
معانا الحرامي
حايصبح عصامي
معانا القلم ابو سن ناعم

معانا الملـوث
حايبقى نضيف
معانا الخسيس
حايصبح شريف
يموت الضمير ويحيا الرغيف
حاتدفع حانمدح
حاترفض حانفضح
معانا القلم أبو سن ناعم

معانا حاتقدر تمارس ..شجاعتك= (بجاحتك)
معانا حاتقدر تؤكد .. صراحتك= (وقاحتك)
معانا حاتقدر "تـعبّـر" براحتك

معانا "اللي ممكن" حايبقى محال
معانا الاجابة حاتصبح سؤال
تتوه "الحقيقة" فى بحر الخيال
معانا القلم أبوسن ناعم

لاحبره بيخلص
ولاسنه يقصف
ولا انت حاتفطس
ولا العمر ينقص

..وهــو معاك
..ماتقلقش أبداً

مافيش حد مرة  يفتش وراك
ولاحد أبداً يدقق معاك
ولا تنقفش يوم من قفاك
طول مابتكتب بابوسن ناعم

أبوذكري..
24 / 11 / 2010




الاثنين، 27 يونيو، 2011

حالة لم تكتمل!!

بحبك بس معرفش ..
بحبك بس معرفش
أسبل أو اقول كلام ناعم
زي العيال النواعم
اللي مقضينها كلام
يبنوا قصور في الرملة
وجزيرة من الأحلام
يجي عليها الموج
تصبح وهم
 تتبدد مع الأيام

وانا اصلي عاشق ..
بس مش عاشق
انا اصلي عاشق
بس مش عاشق
 من بتوع اليوم
عشقي عبادة
كيف الصلاة والصوم

والحب عندي ..
الحب عندي
 قومة مش قولة
قومة تخليني أشب لفوق
 أطول الشمس
واغزلك من شعاعها الدهبي
 توب مقصب بالحنين والشوق

وانا اصلي عاشق
بس مش عاشق
 
من بتوع اليوم

!!

محمد أبوذكري
7/1/2011

الثلاثاء، 21 يونيو، 2011

مش مصدق !!


وبعـديـن !!
جدي مش مصدق إن الثورة قامت.
فاااات أربع شهور :
ولحد النهاردة بتوع الجمعية الزوراعية* مابعتلوش يروح يستلم الـ 5 فدادين، ويتصور مع الريس
..!
صحيح! إحنا لسه ماسمعناش إنهم رجعوا الأرض م البشوات اللي كانوا حاطين إيدهم عليها ..!
وصحيح! إنهم في الجمعية مش فاضيين لجدي واللي زيه، وطول الليل بيسهروا يهربوا الكيماوى والتقاوي للتجار ! وطول النهار مشغولين في "المحجر" اللي تبع الجمعية واللي بيبيع رمل وزلط للفلاحين اللي بيبوروا الأرض ويبنوا عليها
..!
..
وصحيح كماااااااااان! إن عمري ماشفت جدي ! لأنه مات بعد الثورة بشهرين (ثورة 52) ؛؛ ..!
..
بــس برضه !!
مش مصدق إن الثورة قامت.

...
شكلهم حايضحكوا عليك ياجدي زي كل ثورة ؛؛

أبوذكري
1 / 6 / 2011

الثلاثاء، 14 يونيو، 2011

مشهد - (شبه يومي) !!

ع. محسن ـ بك ـ ممتاز - بعد أن فرغ من الكنس والرش امام المحل الصغير الذي يعمل به متخفيا كمكوجي :)
يزعق علي الريس زكريا من المقهي المقابل والذي يعمل به متخفيا كصبي قهوجي:)
يأتي زكريا مسرعا ويرمي علي محسن بك تحية الصباح مصحوبة بغمزة لاتخلو من (خبث) وابتسامة خفيفة واشارة باصبع الابهام = كله تمام:)) 
يتلفت محسن بك حوله (بحذر) ويرد التحية والغمزة (الخبيثة) والاشارة وينسي الابتسامة !!!
ثم يتصنع (الجدية) و بصوت عال يطلب من زكريا احضار شيشة الصباح والقهوة المعتادة !
يهم زكريا بالمغادرة وهو يصيح بنبرة لاتخلو من (خبث) ..وعندك واحد قهوة مظبوطة وواحد شيشه لمحسن بك وصلحه !!

يستدير محسن بك (بخطوات محسوبة) ثم يدلف الي المحل لبرهة ويخرج حاملا كرسيا خشبيا اعتاد الجلوس عليه امام المحل .. (يتلفت حوله) ثم يضع الكرسي في المكان (المعتاد) ويبدأ في تهيئته للجلوس.. ثم يدلف ثانية الي المحل وماهي الا لحظات ويخرج وفي يده ترابيزة معدن صغيرة =طقطوقة..يضعهما بطريقة (فنية معينة) علي بعد خطوات (محددة) من الكرسي  - في ((نفس اللحظة)) !! التي يخرج فيها الريس زكريا من المقهي المقابل حاملا صينية القهوة بيد والشيشة باليد الاخري .. ويسير بخطي (مدروسة)- يبدو انه تم التدرب عليها- في اتجاه محسن-بك-..

 يضع الريس زكريا القهوة علي الترابيزة امام محسن -بك- ويضع الشيشة بجوارها علي الأرض ..
وينحني زكريا  علي الشيشة ويشرع في تظبيط الفحم  وهو يتبادل النظرات (الخبيثة) مع محسن بك ثم يناوله  خرطوم الشيشة.. (بطريقة لاتخلو من مهارة) وينتصب واقفا ويهم بالعودة الي المقهي-

 يلتقط محسن بك الخرطوم بيده بطريقة (لاتقل مهارة عن  تلك التى ناوله بها زكريا)..ثم يرفعــه (بزاوية معينة) ويقرب ميسم الشيشة من فمه وقبل ان يضعه علي فمه !!! يتلفت حوله بنظرات لاتخلو من (الخبث والحذر)..!!

وحينما يتأكد من خلـو المكان :

يرفع رأسه عاليا في لحظة تقع فيها عينيه علي يافطة المقهي في الجهة المقابلة والذي دلف اليه الريس زكريا مذ لحظات ..

وقد كتب عليها بأحرف بارزة وخط عريض :


"قهـــــــــــوة الجــــــواسيس"


فيصيــح محسن -بك- بصوت عال !! (لايخلـــــــو من الحذر !!!):



اصطبحنا وصبح الملك لله!
يجعله استفتاح نادي بإذن الله !
جاسوس من عندك ياااارب!
عميل من عندك ياااكريم!!
طب حتي اجندة خارجية؟!!
ابعت ياللي بتبعت !
 الرزق من عندك يارزاااق!!
صورة (نادرة) للريس زكريا
مع احد (عملاء) المقهي المخلصين


أبـــــوذكري
13 /6 / 2011

الأربعاء، 8 يونيو، 2011

كلام حبلص

أكيد حضرتك سمعت عن (حبلـص )..؟!!!!!

لــــــــو ماسمعتش نحكي لحضرتك :

الأخ حبلص أو حبلظ زي ماتحب ..تالب في أقاتيمية الشوربة .. وكان كاتب ع البيدج بتاعته في الفيس بوك كلام بيسميه عصيدة!!..
في العصيدة بتاعته كان الأخ (حبلز) بيستحلف للشعب ـ اللي هو إحنا ـ بعد وصلة قباحة تدل علي الخرخانة اللي هو بيدرس فيها.. واللي حاز فيها علي لقب التالب المثالي : يعني الألفا بتاع العينة اللي بيدرسوا معاه.. والعينة طبعا بينه اذا كان الفتها حبلص..
 ماعلينا!!..
مفروض ان الناس اتغيرت بعد الثورة وتابت وانابت بدليل الباشمهنز اللي وقف في حفلة التخرج ونتع برضه عصيده عصماء ـ ايه الحوكاااااااية؟!!.. دي بقت اكاتيمية الشــو..عـرااااء.. مش اقاتيمية الشوربة ـ 
المهم!! 

 فاكرين العصيدة طبعا .. اللي البشمهندز كان بيقول فيها :
وجيشها عاميها!! واحنا قديها!! احنا قديها
تصفيق حاااااااد : تيك تيك تيك تيك
علي ايه؟!!!.. مووووش عاااارف؟!!!

نرجع لحبلص:
الأخ (حبلس).. قالوا إنه طلع بيان إعتذر فيه..وقال ان العصيدة مش كلامه وهو ناقلها.. وانه كان مستاء كدا كدا ..م الكلام اول ماشافه (P.p.P.p) لدرجة انه نقله في ((نوت مخصوص عنده)) ـ ماشيرهوش /  طبعا من شووووووودة الاستيااااء ياء يااااااااءـ  وعنون النوت بعنوان (كلااااااااام جامد اخدت بالك م الاستياااااااااااء؟!!؛..((

ماعلينا!! 
 ندق العصفورتين  ونعمل مصدقين (حبلظ)!!

المهم!!

الأخ حااااااابلز وبعد بيان الأسف والاعتذار  .. 
قوووووم ايه!! 
 نشـــر كلام تاني علي صفحته وبيقول لواحد من زبايله*  ـ واحد حبلص يبقي اكيد مزابل* ـ  ان هو اللي كتب الكلام وان الاعتذار ده اي كلام.. 
وكتب حـــبلوزتي بالنص : ” إحنا بنحلق لكو .. وهنفشخكو فشخ يا شعب ” ..

الأكــــــــيد !!
يبدو إن الاخ (حبلذ) لسه عايش في الوهم ×××ومفكر إن زمن الحبلص اللي كان قبل الثورة ممكن يرجع تاني××× (حـــــمرا ياحبلوز)..

قـــــصـره !!

الكلام ادنـــااااااااه !! ماهو الا رد ع العصيدة العمصاء بتاعة الأخ حبلص التالب المثلي بتاع اكاتيمية الشوربة..!
الكلام ده انا كتبته علي نفس الاسلوب الركيك بتاع الاخ حبلص علي كد ماقدرت.. 
وهااااااذوه الكلام ماهو الا حبلصـه للكلام المحبلص اللي حبلصه حبلـص نفسه.. / حبلص بعيد يـاااااا/
وحضرتك ممكن تسميه زي ماتسميه.!.   عصيدة!.. نشيئ!.. أو إن شالله حتي حبلــــ/ث/ذ/ز/ظ/ـــــــــص
المووووووووووووـــــهـم..!!



ويااااااااعزيزي اللي حاتقرأ هذا الكلااااااااام: 

أنا بعتذرمقدما لــــــحضرتك ع الألفاظ وع الركااااااكة بتاعة الكلام (من حق !! وانــــا علي الركاكة بغني :D)  ..
أنا حاولت علي قد ما اقدر اكون علي نفس مستوى الركاكة بتاعة حبلـص.. وطبعا اكيد موووووش حاقددر!!.. ماتنساااااااش برضه إن حبلص التاااااااالب المثلي؛))


ااااااارجووووووووووووك
اااااارجووووووووووووووك
كــــــــــــــــــدر  مـوكفـــــــــــــــي ؛؛؛
...

 اهــــــــــــداء!! 
الي كوووووووووول من كااااااان في نفسه مثقال ذرة من حبلللللللللص؛؛


 ياللي ببتتريق ع الشعب أكيد انت ابن ستين **ــب
شباب الثورة اسيادك وحايطلعوا تييت اللي جابك
لو كنت بتفهم  ياجبان ماكنتش تشتم اللي بيدفع مرتبك ياجعان
لو كنت راجل بصحيح ما كنتش طولت لسانك ع الشعب ياقبيح
لكن الثورة يابنى حرقاك لأنها  علمت علي قفاك
اكيد انت كنت غاوي رسم واتعلقت يوم 28 علي  باب القسم
مهما يابني تلف وتدور  ثورتنا عدل مش زور
و دي رساله مني ليك قبل ما تموت والتراب يتاويك
اتقي الله يا واطي في بلادنا ده شعبها أسيادك مش خدامين اللي جابك
ماسك مسدس  يا خسيس ومش بتفهم غير في التعــريـ*
كبيرك تعمل واحد ع الحريم أو تاكلك شوية برسيم
لكن تكلم ع الثوار دي واسعة عليك ياحمار
العيب مش عليك ياسفيه العيب ع القائد بتاعك اللي ماعرفش يربيك
لو ثورتنا تقوم في يوم  بتهرب ملط من غير هدوم
الثورة دي فخر وضد الظلم والقهر
خليك سايق في التنطيط.. وقاعد في بيتكم زي العبيط
وانا كان عقلك بيقولك اننا ممكن نعتذرلك
فاحب اقولك
مش حانعتذر  يازبالة.. عشان انتم مش رجالة
عامة يامتعوس اللي زيك حتة جاموس
أخــر كلمه حاقولهالك افتكر كويس اللي جـ8ـرالــ2ــك
التــوقيع:
 أسيادك = (الشعب)..
عنـهــم: 
أبوذكري..
8/ 6/ 2011
العاااااااااصــيدة الأصلية كما نتعها حبلص:



اهــدااااااااااااء تاني لحبلص !!


اللي حارقااااااااااااااك :




اهــدااااااااء تااااااااالت لـحااااابلوووووووزتي!!

منك لله ياحبلوزتي ايدي وجعتني من كتر الاهداءااااات!!



فـــــــاكر يا حسب الله !! قصـــدي : يــــا حبلوزتي ؟!!!


الجمعة، 27 مايو، 2011

27 مايو : يوم إستكمال الثورة والتأكيد علي المطالب..

إذا قدر لي النزول يوم 27 بإذن الله ..    
نــــازل ..
عشان أؤكد علي أهم مطلبين من المطالب الاساسية للثورة وهما:
الحرية والعدالة الاجتماعية .. واللي مافيش ولا مطلب منهما اتحقق لحد النهاردة.. 
بالعكس كل اللي تم في الفترة الآخيرة بيقول إن العكس هو اللي بيتحقق  ..


اتفـــــــرج ع العدالة والحرية اللي اتحققوا لحد النهاردة  !!

 شـــــوف العدالــة !! :

  • ·  اخلاء سبيل سوزان مقابل تنازلها عن بضعة ملايين.. ولاعزاء للعدالة وحرامية الملاليم!!
  • · استخدام العنف والقوة لفض اعتصام مجموعة شباب امام السفارة الاسرائيلية بيعبروا عن رأيهم وموقفهم من قضية قومية..
  • ·المحاكمات العسكرية للشباب اللي بيطالبوا بأبسط حقوقهم فى الوقت اللي بيترك فيه البلطجية ومثيري الفتن يمارسوا إجرامهم علي كيف كيفهم  ..
  • · فصل طلاب كلية الاعلام اللي بيطالبوا بتطهير كليتهم من الفساد وديول النظام.. 
  • · التدليل المفرط لأفراد الشرطة الممتنعين عن اداء عملهم وفي نفس الوقت بيقبضوا مرتباتهم ولسه محتفظين بعملهم اللي هم مش بيعملوه.. بعكس الحال مع اي فرد عادى لو رفض اداء عمله واللي بيتحول للتحقيق فورا ويخسر العمل ده..
وأخرة التدليل ده مجرد نقل  للباشا لواء طوخ اللي ظهر في أحد الفيديوهات المتداولة ع النت وهو بينكل  بشاب في وسط الشارع  وبيجرجره من ميكروباص ورجالة الباشا بيضربوه بوحشية عشان مارضيش يقف ويقعد السنيورة بنت الباشا.. (تم الاكتفاء بنقل الباشا.. والباشوات رجالته اللي عدموا الشاب م الضرب محدش اتكلم عن اي عقاب لهم)..
  • · في الوقت اللي بيتم فيه تحويل مدرس م الغربية للنيابة العامة ظهر برضه في أحد  الفيديوهات وهو بيعاقب مجموعة من التلامذة بطريقة وحشية في حضانة تابعة له.. 
المدرس نيابة والمأمور باشا نقل ؛؛وسلــــــــم لــي ع العـــــــــدالة..
  
بــــــــص ع الحريــة !! : 

  • · حرية في  تسريت نوعية معينة من  الاخبار عن رواد المزرعة والحديث عن امراضهم المزعومة واللي صلي منهم في جماعة واللي بيقرأ قرآن والسبحة مابتفارقش ايده.. والهدف م الآخبار دي تجميل صورتهم القبيحة وكسب تعاطف الناس معاهم والتغاضي عن جرايمهم البشعة.. 

  • · حرية الاعلام الفاسد في نشر الشائعات والأكاذيب اللي تقلب الناس ع الثورة وتخليهم ياخدوا موقف سلبي منها.. 


  •  حرية الصحف الصفرا وأبواق أمن الدولة في إتهام الثورة أنها سبب الأزمات اللي بتمر بها البلد وإنها مسئولة عن توقف اسمي النبي حارسها وصاينها عجلة الانتاج..  
وكل مصيبة تحصل يلبسوها للثورة.. ومش ناقـص غيـر إنهم  يطالبوا الحكومة تكتب علب السجايـر: إن الثــورة ضارة جداً بالصحـة، وتسبب الوفاة..

  •  حرية القنوات المشبوهة في إتهام شباب الثورة بالعمالة ورميهم بالأكاذيب والتهم الباطلة..
[ ماهو  الناس عملوا ثورة وضحوا بأرواحهم وهم بيطالبوا بالـ((ــحرية)) !! عشان شباب الثورة يزحفوا علي بطنهم ويركعوا علي ركبهم!
،، ودكر البط اللي اسمه  توفيق عوكاشة يطلع علينا كل يوم يطول لسانه علي دكتور شرف و علي شباب الثورة  .. ويستضيف أحمد إظبايدر والمجانين اللي زيه يـطرطـــ...ـــوا علينا ويشـ.. ـوا في مخ اللي خلفوناا !!]


المهـــــم نرجع ليــــــوم 27 :
بإذن االه ناااازل وأنـــــا :

 عارف ومتأكد إن المجلس مش طمعان في الحكم أو الرياسة لأنه وعد بتسليم السلطة  وغير كده شاف وجع الدماغ اللي بيجي من وراهم..
كمااااااان عارف ومتأكد إن الأمور مش ممكن ترجع لقبل يوم 25 يناير..
 بس المصيبة السوده إن بطريقة الحرية اللي لناس ناس دي والعدالة العوراء دي  ممكن الأمور ترجع لأسوء من يوم 25..
مهم ناخد بالنا من إن :
فيه ناس بيولعوها وعايزينها تبقي حريقة يوم 27 ومصادمات بين الشعب والجيش وللأسف ناس ماشيين وراهم بطيبة وحسن نية ..
المستفيد الوحيد من تصادم الشعب مع الجيش :
هم :
1-   الديابة  اللي محاوطين حدودنا من كل ناحية و مستنين اللحظة دي بفارغ الصبر عشان يلاقوا زريعة يتدخلوا في شئونا ويعوضوا الدور اللي ماقدروش يلعبوه ايام الثورة..
2-   الجماعة الموتورين  اللي الثورة وشبابها علموا عليهم يوم 25 و28 واللي سايبين امن البلد يضرب يقلب وقاعدين زي الستات في البيوت ومش راضيين ينزلوا يشوفوا شغلهم علي امل صدور قانون بانهم يرجعوا يمارسوا شغلهم بنفس الطريقة الوســـخــ.. اللي كانوا بيمارسوه بيها ايام مبارك وحبيب الكلبي بتاعهم .. ولو حصل المصادمات دي يبقي بنقدم لهم اللي في نفسهم علي طبق من فضه..
3-    الثورة المضادة وديول النظام الموتورين م اللي حصل في 25 وسقوط نظام الفساد اللي كان بيحميهم ويداري علي فسادهم واللي كانوا عايمين في خير فساده.. وخسروا كتير بسقوط النظام ده.. أقله الفلوس اللي صرفوها على تزوير  آخر انتخابات قبل الثورة..

مطـــــلــــــوب م الناس الواعية!!
 كلهم ينزلوا يوم 27 عشان نقطع الطريق علي الناس اللي عايزينها تولع وتبقي حرب بين الشعب والجيش..
مطـــــلــــــوب م الناس الواعية!!
كلهم ينزلوا يوم 27 عشان يحموا الشباب المتحمس اللي ممكن ينساق لدعوات المصادمات بحسن نية واللي لو حصلت  ذنب الشباب ده حايبقي في رقبتهم..

مطلوب م الجيش!!
إنه  يحمى الناس ويطمنهم ويرد ع التصريحات الغير مسئولة  اللي بتخرج من هنا ومن هنا عن نية الجيش والشرطة للتعامل بالقوة مع اللي نازلين يوم 27 ..
مطلوب م الجيش!!
يؤكد علي انه حايحمي الناس اللي في الميدان واللي طالعين يحموا ثورتهم ويؤكدوا علي مطالبها.. اللي هو نفسه وعد بحمايتها..
مطلوب م الجيش والناس الواعية!!.
يمنعوا البلطجية من الاندساس وسط الميدان.. خاصة إن دعوة النزول للميدان بتقابلها دعوة من قبل بلطجية وديول النظام البائد بالنزول في نفس اليوم لتأديب شباب التحرير.. مش عايزين مأساة يوم الأربعاء الدامي تتكرر..

القوي والتيارات السياسية اللي قلقوا م الدعوات العبيطة بتاعة التصادم !!..

وقرروا (كالعادة) يقفوا يتفرجوا لحد مايشوفوا الامور حاترسي علي ايه:

امتناعكم عن النزول هو اللي حيؤدي لأن الدعوات دي تتحقق وتؤدي للكارثة اللي أنتم خايفين منها..
ماتكرروش نفس السيناريو  بتاع يوم 25 يناير وامتناعكم عن النزول من أول يوم.. لأنه خسركم كتير قبل ماتتراجعوا عنه وتقرروا النزول والمشاركة..
انزلوا يوم 27 واحموا الميدان ونظموا المتواجدين فيه.. زي ماعملتوا أيام الثورة..
وامنعوا أي عنصر مندس يدخل بين الناس ويشوه اليوم ده ويشوه ثورتنا كلنا..وامل بلدنا.
بإذن الله لو فيه نصيب ونزلت  يوم 27 ..

حايكون عن القناعات دي : إن

  • يوم 27 استكمال لثورتنا الأصلية ثورة 25 يناير .. مش ثورة جديدة لأن الثورة الأولانية ماخلصتش اصلا .. ولا حققت اهدافها عشان يبقي فيه ثورة جديدة..
  • يوم 27 يوم التأكيد علي مطالب ثورتنا .. وأهم مطلبين اللي هما :تحقيق العدالة والحرية علي أرض الواقع مش بالكلام والوعود والشعارات..
  • يوم 27 يوم التذكير بـ والتأكيد علي حق الشهداء والمصابين اللي لسه مارجعش..
  • يوم 27 يوم احياء لروح ثورة 25 وإرساء للقواعد العدالة والديمقراطية والمساواة اللي حاتقوم عليهم دولتنا في عهد جديد خالي م المحاباة أو المحسوبية أو الظلم..
  • يوم 27 تأكيد علي ضرورة إن الفاسدين يتحاكموا محاكمة عادلة عن (كل) جرايمهم والعدالة تاخد مجراها بدون تلكأ  أو محاباة .. لازم كل فاسد يعرف إنه ماعدش حايقدر يفلت بفساده أو جريمته دون عقاب أو حساب..
  • يوم 27 تذكير م الشعب المصري لجيش مصر ومجلسه العسكري بوعده السابق بحماية أهداف الثورة وتأكيده لحرصه علي تحقيق الأهداف دي..
  • يوم 27 يوم تأكيد علي إن الشعب والجيش ايد واحدة بجد مش شعارات..ايد تحقق العدالة وتجيب حق الشهداء وتحارب الفساد وتقضي علي كل ديوله..

نذكركم وأنفسنا:

  •  إن ثورتنا في نص السكة وعاملة زي اللي رقصوا ع السلم لا الكتلة الصامتة نصفوها ولا الفلول سرقوها.. يعنى نقدر نقول عليها نص ثورة..ونص ثورة عمرها ماتودي  للحرية ولا توصل للحقوق..

  •  وإن أي حـد يسمح أو يساعد مبارك ومراته أو أي حد من شلة الفساد.. علي إنهم يهربوا من الجرائم المنسوبة لهم..أويعفيهم من إنهم يخضعوا لمحاكمة عادلة عن الجرائم دي.. يبقـي مجرم زيهم بالضبط..

  •  وإن اللي قابلينا قالوا:
كتر الأسية تقطع عروق المحبة..
والله الموفق..

أبوذكري
26/ 5/ 2011

حاجة غريبة!!!

تبقـي قاعد مع أي حد اليومين دول..! وعمال يكلمك عن أزمة الأنابيب والغاز الي شاحح.. وهو عنده أنبوبة مليانة في البوتجاز وواحدة في الفرن و أتنين استبن..!

ويعزمك ع الغدا..! وأنتم في إنتظار الغدا يفضل واكل دماغك بأزمة الرز ..! لحدما يجي الغدا .. تبص تلاقي السفرة مليانة محشي من جميع الأصناف.!!.

يخلص الغدا (بألف هنا وشفا).. وتقعدوا تستنوا الشاي عشان تحبسوا.. يفتحلك في أزمة القمح اللي مخزونه حايخلص بعد شهرين..!! ويجي الشاي!! تلاقيه بيقدم لك معاه كيك..!

وأنتم بتشربوا الشاي (صحة وعافية) .. وبعد ده كلـه.. يقولك فيه ازمة في المرتبات ومش حايقبضونا؟!!!..

.. تقوم ماسك نفسك بالعافية عشان عيب مايصحش أنت في بيته.. وتقول في سرك حسبنا الله ونعم الوكيل
 وتشكره ع العزومة وتنك ماشي!!..

أبوذكري
18/ 5 / 2010

إعتذارك مرفوض .. وحاترجع الفلوس حاترجعها ياحرامي!!

الحـــــوار ! اللي ظهر  ع الساحة فجأة ده ـ الخاص بإن مبارك يعتذر للشعب وسماح النوبة وحرمت ومش حاعمل كده تانى ـ ويتنازل عن الفلوس والممتلكات ـ نقدر نقول عليه بلغة اليومين دووول ـ حوار "فاااااااااكس"..  
وحــــــوار ! إننا نقبل الاعتذار  ـ أكسب لنا ـ وعفا الله عما سُرق .. لأننا مش حانقدر نجيب الفلوس والحسابات السرية اللي ماحدش يعرفها غيره.. برضه حوار شرح الحوار اللي قبلـه بالظبط..


لأن ! بسلامته لما يتحاكم ويُثبت إنه حرامي حايرجع الفلوس حيرجعها برضاه أو من غير..

ولأن ! فيه جهات رسمية  مسئوليتها إنها تحقق في موضوع الحسابات السرية ده وتلاحق الفلوس وتتبعها.. وتجيبها..ولــو! ست رسمية ماقدرتش أو كانت بعافية شوية.. ممكن اي حد م الناس المحترمين اللي تبع الثورة واللي بيفهموا في الاقتصاد والبنوك واللي لهم صلات وعلاقات دولية يخلصوا الموضوع ده لرسمية هانم..  

ولـو نفتكر !!
إنه بعد خلع مبارك مباشرة.. وأيام حكومة شفيق ياراجل.. ولما كل الناس كانوا مبهورين باللي حصل.. كان فيه اخبار عن إن فيه دول أجنبية عرضت تجميد أرصدة المخلوع ومساعدتنا في رد الفلوس المنهوبة.. بس حكومة شفيق ياراجل ..طبعا عشان كانت حكومة (وطنية) .. ما سألتش في الموضوع ده..

... ... ...
أصًلا .. أصلا .. بقي ..
يحز في نفسي إن يكون فيه  حوارات فكسانة بالشكل ده في بلد داخلة علي مرحلة ديمقراطية وبتكلم عن دولة سيادة القانون والعدل والمساواة..
وتقوم تبدأها كده وأول القصيدة تبقي خياااااااااار ومبارك..
وناس تسرق وتتحبس.. وناس تسرق وتعتذر..

طب سيبك من كده وبعد مانخش بالسلامة.. علي دولة القانون ويبقي عندنا عدل ومساواة زي بقية الدول المحترمة..
و فيه لص عادي أتمسك وهو بيسرق  او موظف اتقبض عليه وهو بيختلس .. وقالنا سامحونى زي مبارك ! وحارجع لكم الفلوس اللي سرقتها ..يبقي ازى الحال بقي؟!.. حد يقدر يرفض؟!.. مش اصول العدل والمساواة:إن اللي يمشي علي مواطن يمشي علي بقية المواطنين؟!.. 
إفرض بقي!! إن اللص أو الموظف المختلس ده عمل 100 عملية قبل كده!! ومااتمسكش أو ما اكتشفناش إلا آخر عملية بس ..الليهو رجع فلوسها  وإحنا سامحناه  عليها.. وبسلامته هرب أول ما اخد صك العفو والغفران والسماح ..قبل مايتحقق معاااااااااااااه.. ونكتشف باقي العمليات.. ويتحاسب عليهم .. وصاحبنا هرب بفلوس الـ99 عملية  علي أي دولة م اللي مافيهومش إتفاقيات لتسليم المجرمين.. يبقي ازي الحال بقي؟!!.. وأخينا قاعد في البلد دي يتمتع بالفلوس اللي هو سارقها ويطلع لنا لسانه؟!!
قيس بقي سعادتك علي حوار الحرامي أبو 100 عملية ده ـ  وحط في دماغك إن مافيش حرامي عنده ضمير أصلا.. ماهو لو عنده ضمير كان خاف من ربنا وماكنش سرق.ـ
وأسأل نفسك بقي: إيه اللي يضمن لنا إن لو مبارك حرامي فعلا وسرق الفلوس ..إنه يقولنا ويكشف لنا كل الحسابات والأرصدة؟!!
مش ممكن يعمل زي زميله في المهنة (صاحب الـ100 عملية) ويكشف لنا رصيد واحد بس أو حتى 10 ويخفي الـ99 أو الـ90 الباقيين.. ويطلع يتمتع بيهم مع أخينا التاني ده في دولة من إياهم ويطلع لنا لسانه ويغيظ فينا هو كماااااان..

وخد بال سعادتك..!! إن كل (الحرامية) اللي في المزرعة مستنيين الخطوة دي تحصل عشان يطالبوا إنهم يتعاملوا بالمثل..
ويرموا لنا كام مليون .. ويطلعوا يتمتعوا بالمليارات .. ويطلعوا لنا لسانهم ويغيظونا هم كماااااان.. وارجع سعادتك  بالذاكرة كده لعرض أحمد عز في بداية المحاكماااااااااااات!!

... ... ...
والأهم بقي من ده كله!!
وبعيدا عن حوار الفلوس والممتلكات ده..
خلينا نطرح..
سؤاااال:
هل جريمة مبارك هي السرقة وبس؟!!..
يعنى مشكلتنا معاه إنه حرامي.. وممكن يرد الفلوس اللي سرقها ونسامحه وعفا الله عما سلف؟!!..
والإجاااابة:
 إن جريمة مبارك  عمرها ماكانت السرقة وبس..!!
السرقة والحسابات دي اكتشفناها بالصدفة !! والناس بتدور وتنخور وراه عشان تحاكمه علي جرايم  ومصايب 30 سنة .. كان معيش فيهم الشعب في قهر وذل وظلم وجهل.. سرطن عيشة الناس وموتهم بالبطئ وساب الديابة والكلاب اللي حواليه ينهشوا في الشعب ويثروا ويكبروا علي حساب الغلابة والبسطاء واللي ماكنش بيفوت مناسبه الا ويقول انهم هدفه.. طبعا هدفه عشان يخلص عليهم ويبيدهم ويخلص منهم..
جريمة مبارك  ماهياش سرقة وبس!! إنما دي سلسلة طوييييييلة من الجرايم علي كل شكل ولون..
أخرها بس!!  علي سبيل المثال لا الحصر جريمة قتل الشهداء أيام الثورة..

يعنى حتى لو أتنازل عن الفلوس اللي لهفها وحصل صلح في جريمة السرقة...
لازم يتحاكم علي بقية الجرايم..

... ... ...
الخلاصة في موضوع الاعتذار ورد الفلوس ده:

أنا شايف إن مبارك يخضع لمحاكمة عادلة ونزهية مافيهاش اي شبهة مجاملة او ظلم..

ولو المحاكمة أثبتت انه برئ والفلوس بتاعته يبقي خلااااص. حلال عليه.. !وحرام علينا..!
ويبقي هو احتفظ بفلوسه ..واحنا ما اخدناش فلوس حرام مش من حقنا..
أما بقي لو لو ثبت انه مذنب..!!
يبقي القانون يقول كلمته.. واللي يمشي علي أي حد في جريمة زي دي يمشي عليه..!
وطبيعي لو هو مذنب و الفلوس مش بتاعته .. إنه يرد الفلوس لأصحابها..

وكده لايبقي الشعب إتظلم ولامبارك نفسه إتظلم..!
وأظن إن مبدأ العدل والمساواة امام القانون بيقول كده..!
... ... ... ... ... ... ... ... ...
ملحوظة اخيـــــــرة:
"أنا مبسوط ومظقطط آخر ظقططة.. م الحمار !! أو مجموعة الحمير (وربنا يحفظهم  لمبااااااارك يارب ويطول لنا في ودانهم كمان وكمان ومايحرمناش من غباءهم ابدا ابدا):
مبسوط منهم عشان! اقترحوا علي مبارك إنه يطلع يقول كلمة يعتذر فيها للشعب ويقول إن عنده إستعداد يتنازل عن الفلوس والممتلكات..

ولازم كلنا نجهز نفسنا من دلوقت ونستنى الكلمة دي علي أحر م الجمر..وأول ما الكلمة تتذاع نسجلها وننسخها علي سيديهات ماركة مرتضي منصور..! لأن الكلمة دي حاتكون أول مستند بل أهم  مستند في ملف قضية فساد مبارك..لأن إعتذاره معناه!! اعتراف منه انه إرتكب جريمة تستحق الإعتذار ..وتنازله عن الفلوس مالهوش غير معنى واحد وهو ان الفلوس مش بتاعته..وانه فعلا سارقها وبيرجعها لأصحابها..والأهم من كده بقي إن الكلمة دي حاتكون أكبر دليل علي إن مبارك كداب..وكل اللي قاله في التسجيل الأولانى اللي أذاعته العربية  كدب × كدب..
خاصة إنه كان بيقول في التسجيل إنه لايملك اي حسابات أو أرصدة في الخارج وكل حساباته معروفة..
مش كده وبس دا كان بيهدد ويتوعد إنه حايلاحق كل من تعمد النيل منه ومن سمعته !!

 الله يرحمك ياسُمعـه !!!

أبوذكري
17 / 5 / 2011