الجمعة، 27 مايو، 2011

27 مايو : يوم إستكمال الثورة والتأكيد علي المطالب..

إذا قدر لي النزول يوم 27 بإذن الله ..    
نــــازل ..
عشان أؤكد علي أهم مطلبين من المطالب الاساسية للثورة وهما:
الحرية والعدالة الاجتماعية .. واللي مافيش ولا مطلب منهما اتحقق لحد النهاردة.. 
بالعكس كل اللي تم في الفترة الآخيرة بيقول إن العكس هو اللي بيتحقق  ..


اتفـــــــرج ع العدالة والحرية اللي اتحققوا لحد النهاردة  !!

 شـــــوف العدالــة !! :

  • ·  اخلاء سبيل سوزان مقابل تنازلها عن بضعة ملايين.. ولاعزاء للعدالة وحرامية الملاليم!!
  • · استخدام العنف والقوة لفض اعتصام مجموعة شباب امام السفارة الاسرائيلية بيعبروا عن رأيهم وموقفهم من قضية قومية..
  • ·المحاكمات العسكرية للشباب اللي بيطالبوا بأبسط حقوقهم فى الوقت اللي بيترك فيه البلطجية ومثيري الفتن يمارسوا إجرامهم علي كيف كيفهم  ..
  • · فصل طلاب كلية الاعلام اللي بيطالبوا بتطهير كليتهم من الفساد وديول النظام.. 
  • · التدليل المفرط لأفراد الشرطة الممتنعين عن اداء عملهم وفي نفس الوقت بيقبضوا مرتباتهم ولسه محتفظين بعملهم اللي هم مش بيعملوه.. بعكس الحال مع اي فرد عادى لو رفض اداء عمله واللي بيتحول للتحقيق فورا ويخسر العمل ده..
وأخرة التدليل ده مجرد نقل  للباشا لواء طوخ اللي ظهر في أحد الفيديوهات المتداولة ع النت وهو بينكل  بشاب في وسط الشارع  وبيجرجره من ميكروباص ورجالة الباشا بيضربوه بوحشية عشان مارضيش يقف ويقعد السنيورة بنت الباشا.. (تم الاكتفاء بنقل الباشا.. والباشوات رجالته اللي عدموا الشاب م الضرب محدش اتكلم عن اي عقاب لهم)..
  • · في الوقت اللي بيتم فيه تحويل مدرس م الغربية للنيابة العامة ظهر برضه في أحد  الفيديوهات وهو بيعاقب مجموعة من التلامذة بطريقة وحشية في حضانة تابعة له.. 
المدرس نيابة والمأمور باشا نقل ؛؛وسلــــــــم لــي ع العـــــــــدالة..
  
بــــــــص ع الحريــة !! : 

  • · حرية في  تسريت نوعية معينة من  الاخبار عن رواد المزرعة والحديث عن امراضهم المزعومة واللي صلي منهم في جماعة واللي بيقرأ قرآن والسبحة مابتفارقش ايده.. والهدف م الآخبار دي تجميل صورتهم القبيحة وكسب تعاطف الناس معاهم والتغاضي عن جرايمهم البشعة.. 

  • · حرية الاعلام الفاسد في نشر الشائعات والأكاذيب اللي تقلب الناس ع الثورة وتخليهم ياخدوا موقف سلبي منها.. 


  •  حرية الصحف الصفرا وأبواق أمن الدولة في إتهام الثورة أنها سبب الأزمات اللي بتمر بها البلد وإنها مسئولة عن توقف اسمي النبي حارسها وصاينها عجلة الانتاج..  
وكل مصيبة تحصل يلبسوها للثورة.. ومش ناقـص غيـر إنهم  يطالبوا الحكومة تكتب علب السجايـر: إن الثــورة ضارة جداً بالصحـة، وتسبب الوفاة..

  •  حرية القنوات المشبوهة في إتهام شباب الثورة بالعمالة ورميهم بالأكاذيب والتهم الباطلة..
[ ماهو  الناس عملوا ثورة وضحوا بأرواحهم وهم بيطالبوا بالـ((ــحرية)) !! عشان شباب الثورة يزحفوا علي بطنهم ويركعوا علي ركبهم!
،، ودكر البط اللي اسمه  توفيق عوكاشة يطلع علينا كل يوم يطول لسانه علي دكتور شرف و علي شباب الثورة  .. ويستضيف أحمد إظبايدر والمجانين اللي زيه يـطرطـــ...ـــوا علينا ويشـ.. ـوا في مخ اللي خلفوناا !!]


المهـــــم نرجع ليــــــوم 27 :
بإذن االه ناااازل وأنـــــا :

 عارف ومتأكد إن المجلس مش طمعان في الحكم أو الرياسة لأنه وعد بتسليم السلطة  وغير كده شاف وجع الدماغ اللي بيجي من وراهم..
كمااااااان عارف ومتأكد إن الأمور مش ممكن ترجع لقبل يوم 25 يناير..
 بس المصيبة السوده إن بطريقة الحرية اللي لناس ناس دي والعدالة العوراء دي  ممكن الأمور ترجع لأسوء من يوم 25..
مهم ناخد بالنا من إن :
فيه ناس بيولعوها وعايزينها تبقي حريقة يوم 27 ومصادمات بين الشعب والجيش وللأسف ناس ماشيين وراهم بطيبة وحسن نية ..
المستفيد الوحيد من تصادم الشعب مع الجيش :
هم :
1-   الديابة  اللي محاوطين حدودنا من كل ناحية و مستنين اللحظة دي بفارغ الصبر عشان يلاقوا زريعة يتدخلوا في شئونا ويعوضوا الدور اللي ماقدروش يلعبوه ايام الثورة..
2-   الجماعة الموتورين  اللي الثورة وشبابها علموا عليهم يوم 25 و28 واللي سايبين امن البلد يضرب يقلب وقاعدين زي الستات في البيوت ومش راضيين ينزلوا يشوفوا شغلهم علي امل صدور قانون بانهم يرجعوا يمارسوا شغلهم بنفس الطريقة الوســـخــ.. اللي كانوا بيمارسوه بيها ايام مبارك وحبيب الكلبي بتاعهم .. ولو حصل المصادمات دي يبقي بنقدم لهم اللي في نفسهم علي طبق من فضه..
3-    الثورة المضادة وديول النظام الموتورين م اللي حصل في 25 وسقوط نظام الفساد اللي كان بيحميهم ويداري علي فسادهم واللي كانوا عايمين في خير فساده.. وخسروا كتير بسقوط النظام ده.. أقله الفلوس اللي صرفوها على تزوير  آخر انتخابات قبل الثورة..

مطـــــلــــــوب م الناس الواعية!!
 كلهم ينزلوا يوم 27 عشان نقطع الطريق علي الناس اللي عايزينها تولع وتبقي حرب بين الشعب والجيش..
مطـــــلــــــوب م الناس الواعية!!
كلهم ينزلوا يوم 27 عشان يحموا الشباب المتحمس اللي ممكن ينساق لدعوات المصادمات بحسن نية واللي لو حصلت  ذنب الشباب ده حايبقي في رقبتهم..

مطلوب م الجيش!!
إنه  يحمى الناس ويطمنهم ويرد ع التصريحات الغير مسئولة  اللي بتخرج من هنا ومن هنا عن نية الجيش والشرطة للتعامل بالقوة مع اللي نازلين يوم 27 ..
مطلوب م الجيش!!
يؤكد علي انه حايحمي الناس اللي في الميدان واللي طالعين يحموا ثورتهم ويؤكدوا علي مطالبها.. اللي هو نفسه وعد بحمايتها..
مطلوب م الجيش والناس الواعية!!.
يمنعوا البلطجية من الاندساس وسط الميدان.. خاصة إن دعوة النزول للميدان بتقابلها دعوة من قبل بلطجية وديول النظام البائد بالنزول في نفس اليوم لتأديب شباب التحرير.. مش عايزين مأساة يوم الأربعاء الدامي تتكرر..

القوي والتيارات السياسية اللي قلقوا م الدعوات العبيطة بتاعة التصادم !!..

وقرروا (كالعادة) يقفوا يتفرجوا لحد مايشوفوا الامور حاترسي علي ايه:

امتناعكم عن النزول هو اللي حيؤدي لأن الدعوات دي تتحقق وتؤدي للكارثة اللي أنتم خايفين منها..
ماتكرروش نفس السيناريو  بتاع يوم 25 يناير وامتناعكم عن النزول من أول يوم.. لأنه خسركم كتير قبل ماتتراجعوا عنه وتقرروا النزول والمشاركة..
انزلوا يوم 27 واحموا الميدان ونظموا المتواجدين فيه.. زي ماعملتوا أيام الثورة..
وامنعوا أي عنصر مندس يدخل بين الناس ويشوه اليوم ده ويشوه ثورتنا كلنا..وامل بلدنا.
بإذن الله لو فيه نصيب ونزلت  يوم 27 ..

حايكون عن القناعات دي : إن

  • يوم 27 استكمال لثورتنا الأصلية ثورة 25 يناير .. مش ثورة جديدة لأن الثورة الأولانية ماخلصتش اصلا .. ولا حققت اهدافها عشان يبقي فيه ثورة جديدة..
  • يوم 27 يوم التأكيد علي مطالب ثورتنا .. وأهم مطلبين اللي هما :تحقيق العدالة والحرية علي أرض الواقع مش بالكلام والوعود والشعارات..
  • يوم 27 يوم التذكير بـ والتأكيد علي حق الشهداء والمصابين اللي لسه مارجعش..
  • يوم 27 يوم احياء لروح ثورة 25 وإرساء للقواعد العدالة والديمقراطية والمساواة اللي حاتقوم عليهم دولتنا في عهد جديد خالي م المحاباة أو المحسوبية أو الظلم..
  • يوم 27 تأكيد علي ضرورة إن الفاسدين يتحاكموا محاكمة عادلة عن (كل) جرايمهم والعدالة تاخد مجراها بدون تلكأ  أو محاباة .. لازم كل فاسد يعرف إنه ماعدش حايقدر يفلت بفساده أو جريمته دون عقاب أو حساب..
  • يوم 27 تذكير م الشعب المصري لجيش مصر ومجلسه العسكري بوعده السابق بحماية أهداف الثورة وتأكيده لحرصه علي تحقيق الأهداف دي..
  • يوم 27 يوم تأكيد علي إن الشعب والجيش ايد واحدة بجد مش شعارات..ايد تحقق العدالة وتجيب حق الشهداء وتحارب الفساد وتقضي علي كل ديوله..

نذكركم وأنفسنا:

  •  إن ثورتنا في نص السكة وعاملة زي اللي رقصوا ع السلم لا الكتلة الصامتة نصفوها ولا الفلول سرقوها.. يعنى نقدر نقول عليها نص ثورة..ونص ثورة عمرها ماتودي  للحرية ولا توصل للحقوق..

  •  وإن أي حـد يسمح أو يساعد مبارك ومراته أو أي حد من شلة الفساد.. علي إنهم يهربوا من الجرائم المنسوبة لهم..أويعفيهم من إنهم يخضعوا لمحاكمة عادلة عن الجرائم دي.. يبقـي مجرم زيهم بالضبط..

  •  وإن اللي قابلينا قالوا:
كتر الأسية تقطع عروق المحبة..
والله الموفق..

أبوذكري
26/ 5/ 2011

ليست هناك تعليقات:

إرسال تعليق