الجمعة، 27 مايو، 2011

27 مايو : يوم إستكمال الثورة والتأكيد علي المطالب..

إذا قدر لي النزول يوم 27 بإذن الله ..    
نــــازل ..
عشان أؤكد علي أهم مطلبين من المطالب الاساسية للثورة وهما:
الحرية والعدالة الاجتماعية .. واللي مافيش ولا مطلب منهما اتحقق لحد النهاردة.. 
بالعكس كل اللي تم في الفترة الآخيرة بيقول إن العكس هو اللي بيتحقق  ..


اتفـــــــرج ع العدالة والحرية اللي اتحققوا لحد النهاردة  !!

 شـــــوف العدالــة !! :

  • ·  اخلاء سبيل سوزان مقابل تنازلها عن بضعة ملايين.. ولاعزاء للعدالة وحرامية الملاليم!!
  • · استخدام العنف والقوة لفض اعتصام مجموعة شباب امام السفارة الاسرائيلية بيعبروا عن رأيهم وموقفهم من قضية قومية..
  • ·المحاكمات العسكرية للشباب اللي بيطالبوا بأبسط حقوقهم فى الوقت اللي بيترك فيه البلطجية ومثيري الفتن يمارسوا إجرامهم علي كيف كيفهم  ..
  • · فصل طلاب كلية الاعلام اللي بيطالبوا بتطهير كليتهم من الفساد وديول النظام.. 
  • · التدليل المفرط لأفراد الشرطة الممتنعين عن اداء عملهم وفي نفس الوقت بيقبضوا مرتباتهم ولسه محتفظين بعملهم اللي هم مش بيعملوه.. بعكس الحال مع اي فرد عادى لو رفض اداء عمله واللي بيتحول للتحقيق فورا ويخسر العمل ده..
وأخرة التدليل ده مجرد نقل  للباشا لواء طوخ اللي ظهر في أحد الفيديوهات المتداولة ع النت وهو بينكل  بشاب في وسط الشارع  وبيجرجره من ميكروباص ورجالة الباشا بيضربوه بوحشية عشان مارضيش يقف ويقعد السنيورة بنت الباشا.. (تم الاكتفاء بنقل الباشا.. والباشوات رجالته اللي عدموا الشاب م الضرب محدش اتكلم عن اي عقاب لهم)..
  • · في الوقت اللي بيتم فيه تحويل مدرس م الغربية للنيابة العامة ظهر برضه في أحد  الفيديوهات وهو بيعاقب مجموعة من التلامذة بطريقة وحشية في حضانة تابعة له.. 
المدرس نيابة والمأمور باشا نقل ؛؛وسلــــــــم لــي ع العـــــــــدالة..
  
بــــــــص ع الحريــة !! : 

  • · حرية في  تسريت نوعية معينة من  الاخبار عن رواد المزرعة والحديث عن امراضهم المزعومة واللي صلي منهم في جماعة واللي بيقرأ قرآن والسبحة مابتفارقش ايده.. والهدف م الآخبار دي تجميل صورتهم القبيحة وكسب تعاطف الناس معاهم والتغاضي عن جرايمهم البشعة.. 

  • · حرية الاعلام الفاسد في نشر الشائعات والأكاذيب اللي تقلب الناس ع الثورة وتخليهم ياخدوا موقف سلبي منها.. 


  •  حرية الصحف الصفرا وأبواق أمن الدولة في إتهام الثورة أنها سبب الأزمات اللي بتمر بها البلد وإنها مسئولة عن توقف اسمي النبي حارسها وصاينها عجلة الانتاج..  
وكل مصيبة تحصل يلبسوها للثورة.. ومش ناقـص غيـر إنهم  يطالبوا الحكومة تكتب علب السجايـر: إن الثــورة ضارة جداً بالصحـة، وتسبب الوفاة..

  •  حرية القنوات المشبوهة في إتهام شباب الثورة بالعمالة ورميهم بالأكاذيب والتهم الباطلة..
[ ماهو  الناس عملوا ثورة وضحوا بأرواحهم وهم بيطالبوا بالـ((ــحرية)) !! عشان شباب الثورة يزحفوا علي بطنهم ويركعوا علي ركبهم!
،، ودكر البط اللي اسمه  توفيق عوكاشة يطلع علينا كل يوم يطول لسانه علي دكتور شرف و علي شباب الثورة  .. ويستضيف أحمد إظبايدر والمجانين اللي زيه يـطرطـــ...ـــوا علينا ويشـ.. ـوا في مخ اللي خلفوناا !!]


المهـــــم نرجع ليــــــوم 27 :
بإذن االه ناااازل وأنـــــا :

 عارف ومتأكد إن المجلس مش طمعان في الحكم أو الرياسة لأنه وعد بتسليم السلطة  وغير كده شاف وجع الدماغ اللي بيجي من وراهم..
كمااااااان عارف ومتأكد إن الأمور مش ممكن ترجع لقبل يوم 25 يناير..
 بس المصيبة السوده إن بطريقة الحرية اللي لناس ناس دي والعدالة العوراء دي  ممكن الأمور ترجع لأسوء من يوم 25..
مهم ناخد بالنا من إن :
فيه ناس بيولعوها وعايزينها تبقي حريقة يوم 27 ومصادمات بين الشعب والجيش وللأسف ناس ماشيين وراهم بطيبة وحسن نية ..
المستفيد الوحيد من تصادم الشعب مع الجيش :
هم :
1-   الديابة  اللي محاوطين حدودنا من كل ناحية و مستنين اللحظة دي بفارغ الصبر عشان يلاقوا زريعة يتدخلوا في شئونا ويعوضوا الدور اللي ماقدروش يلعبوه ايام الثورة..
2-   الجماعة الموتورين  اللي الثورة وشبابها علموا عليهم يوم 25 و28 واللي سايبين امن البلد يضرب يقلب وقاعدين زي الستات في البيوت ومش راضيين ينزلوا يشوفوا شغلهم علي امل صدور قانون بانهم يرجعوا يمارسوا شغلهم بنفس الطريقة الوســـخــ.. اللي كانوا بيمارسوه بيها ايام مبارك وحبيب الكلبي بتاعهم .. ولو حصل المصادمات دي يبقي بنقدم لهم اللي في نفسهم علي طبق من فضه..
3-    الثورة المضادة وديول النظام الموتورين م اللي حصل في 25 وسقوط نظام الفساد اللي كان بيحميهم ويداري علي فسادهم واللي كانوا عايمين في خير فساده.. وخسروا كتير بسقوط النظام ده.. أقله الفلوس اللي صرفوها على تزوير  آخر انتخابات قبل الثورة..

مطـــــلــــــوب م الناس الواعية!!
 كلهم ينزلوا يوم 27 عشان نقطع الطريق علي الناس اللي عايزينها تولع وتبقي حرب بين الشعب والجيش..
مطـــــلــــــوب م الناس الواعية!!
كلهم ينزلوا يوم 27 عشان يحموا الشباب المتحمس اللي ممكن ينساق لدعوات المصادمات بحسن نية واللي لو حصلت  ذنب الشباب ده حايبقي في رقبتهم..

مطلوب م الجيش!!
إنه  يحمى الناس ويطمنهم ويرد ع التصريحات الغير مسئولة  اللي بتخرج من هنا ومن هنا عن نية الجيش والشرطة للتعامل بالقوة مع اللي نازلين يوم 27 ..
مطلوب م الجيش!!
يؤكد علي انه حايحمي الناس اللي في الميدان واللي طالعين يحموا ثورتهم ويؤكدوا علي مطالبها.. اللي هو نفسه وعد بحمايتها..
مطلوب م الجيش والناس الواعية!!.
يمنعوا البلطجية من الاندساس وسط الميدان.. خاصة إن دعوة النزول للميدان بتقابلها دعوة من قبل بلطجية وديول النظام البائد بالنزول في نفس اليوم لتأديب شباب التحرير.. مش عايزين مأساة يوم الأربعاء الدامي تتكرر..

القوي والتيارات السياسية اللي قلقوا م الدعوات العبيطة بتاعة التصادم !!..

وقرروا (كالعادة) يقفوا يتفرجوا لحد مايشوفوا الامور حاترسي علي ايه:

امتناعكم عن النزول هو اللي حيؤدي لأن الدعوات دي تتحقق وتؤدي للكارثة اللي أنتم خايفين منها..
ماتكرروش نفس السيناريو  بتاع يوم 25 يناير وامتناعكم عن النزول من أول يوم.. لأنه خسركم كتير قبل ماتتراجعوا عنه وتقرروا النزول والمشاركة..
انزلوا يوم 27 واحموا الميدان ونظموا المتواجدين فيه.. زي ماعملتوا أيام الثورة..
وامنعوا أي عنصر مندس يدخل بين الناس ويشوه اليوم ده ويشوه ثورتنا كلنا..وامل بلدنا.
بإذن الله لو فيه نصيب ونزلت  يوم 27 ..

حايكون عن القناعات دي : إن

  • يوم 27 استكمال لثورتنا الأصلية ثورة 25 يناير .. مش ثورة جديدة لأن الثورة الأولانية ماخلصتش اصلا .. ولا حققت اهدافها عشان يبقي فيه ثورة جديدة..
  • يوم 27 يوم التأكيد علي مطالب ثورتنا .. وأهم مطلبين اللي هما :تحقيق العدالة والحرية علي أرض الواقع مش بالكلام والوعود والشعارات..
  • يوم 27 يوم التذكير بـ والتأكيد علي حق الشهداء والمصابين اللي لسه مارجعش..
  • يوم 27 يوم احياء لروح ثورة 25 وإرساء للقواعد العدالة والديمقراطية والمساواة اللي حاتقوم عليهم دولتنا في عهد جديد خالي م المحاباة أو المحسوبية أو الظلم..
  • يوم 27 تأكيد علي ضرورة إن الفاسدين يتحاكموا محاكمة عادلة عن (كل) جرايمهم والعدالة تاخد مجراها بدون تلكأ  أو محاباة .. لازم كل فاسد يعرف إنه ماعدش حايقدر يفلت بفساده أو جريمته دون عقاب أو حساب..
  • يوم 27 تذكير م الشعب المصري لجيش مصر ومجلسه العسكري بوعده السابق بحماية أهداف الثورة وتأكيده لحرصه علي تحقيق الأهداف دي..
  • يوم 27 يوم تأكيد علي إن الشعب والجيش ايد واحدة بجد مش شعارات..ايد تحقق العدالة وتجيب حق الشهداء وتحارب الفساد وتقضي علي كل ديوله..

نذكركم وأنفسنا:

  •  إن ثورتنا في نص السكة وعاملة زي اللي رقصوا ع السلم لا الكتلة الصامتة نصفوها ولا الفلول سرقوها.. يعنى نقدر نقول عليها نص ثورة..ونص ثورة عمرها ماتودي  للحرية ولا توصل للحقوق..

  •  وإن أي حـد يسمح أو يساعد مبارك ومراته أو أي حد من شلة الفساد.. علي إنهم يهربوا من الجرائم المنسوبة لهم..أويعفيهم من إنهم يخضعوا لمحاكمة عادلة عن الجرائم دي.. يبقـي مجرم زيهم بالضبط..

  •  وإن اللي قابلينا قالوا:
كتر الأسية تقطع عروق المحبة..
والله الموفق..

أبوذكري
26/ 5/ 2011

حاجة غريبة!!!

تبقـي قاعد مع أي حد اليومين دول..! وعمال يكلمك عن أزمة الأنابيب والغاز الي شاحح.. وهو عنده أنبوبة مليانة في البوتجاز وواحدة في الفرن و أتنين استبن..!

ويعزمك ع الغدا..! وأنتم في إنتظار الغدا يفضل واكل دماغك بأزمة الرز ..! لحدما يجي الغدا .. تبص تلاقي السفرة مليانة محشي من جميع الأصناف.!!.

يخلص الغدا (بألف هنا وشفا).. وتقعدوا تستنوا الشاي عشان تحبسوا.. يفتحلك في أزمة القمح اللي مخزونه حايخلص بعد شهرين..!! ويجي الشاي!! تلاقيه بيقدم لك معاه كيك..!

وأنتم بتشربوا الشاي (صحة وعافية) .. وبعد ده كلـه.. يقولك فيه ازمة في المرتبات ومش حايقبضونا؟!!!..

.. تقوم ماسك نفسك بالعافية عشان عيب مايصحش أنت في بيته.. وتقول في سرك حسبنا الله ونعم الوكيل
 وتشكره ع العزومة وتنك ماشي!!..

أبوذكري
18/ 5 / 2010

إعتذارك مرفوض .. وحاترجع الفلوس حاترجعها ياحرامي!!

الحـــــوار ! اللي ظهر  ع الساحة فجأة ده ـ الخاص بإن مبارك يعتذر للشعب وسماح النوبة وحرمت ومش حاعمل كده تانى ـ ويتنازل عن الفلوس والممتلكات ـ نقدر نقول عليه بلغة اليومين دووول ـ حوار "فاااااااااكس"..  
وحــــــوار ! إننا نقبل الاعتذار  ـ أكسب لنا ـ وعفا الله عما سُرق .. لأننا مش حانقدر نجيب الفلوس والحسابات السرية اللي ماحدش يعرفها غيره.. برضه حوار شرح الحوار اللي قبلـه بالظبط..


لأن ! بسلامته لما يتحاكم ويُثبت إنه حرامي حايرجع الفلوس حيرجعها برضاه أو من غير..

ولأن ! فيه جهات رسمية  مسئوليتها إنها تحقق في موضوع الحسابات السرية ده وتلاحق الفلوس وتتبعها.. وتجيبها..ولــو! ست رسمية ماقدرتش أو كانت بعافية شوية.. ممكن اي حد م الناس المحترمين اللي تبع الثورة واللي بيفهموا في الاقتصاد والبنوك واللي لهم صلات وعلاقات دولية يخلصوا الموضوع ده لرسمية هانم..  

ولـو نفتكر !!
إنه بعد خلع مبارك مباشرة.. وأيام حكومة شفيق ياراجل.. ولما كل الناس كانوا مبهورين باللي حصل.. كان فيه اخبار عن إن فيه دول أجنبية عرضت تجميد أرصدة المخلوع ومساعدتنا في رد الفلوس المنهوبة.. بس حكومة شفيق ياراجل ..طبعا عشان كانت حكومة (وطنية) .. ما سألتش في الموضوع ده..

... ... ...
أصًلا .. أصلا .. بقي ..
يحز في نفسي إن يكون فيه  حوارات فكسانة بالشكل ده في بلد داخلة علي مرحلة ديمقراطية وبتكلم عن دولة سيادة القانون والعدل والمساواة..
وتقوم تبدأها كده وأول القصيدة تبقي خياااااااااار ومبارك..
وناس تسرق وتتحبس.. وناس تسرق وتعتذر..

طب سيبك من كده وبعد مانخش بالسلامة.. علي دولة القانون ويبقي عندنا عدل ومساواة زي بقية الدول المحترمة..
و فيه لص عادي أتمسك وهو بيسرق  او موظف اتقبض عليه وهو بيختلس .. وقالنا سامحونى زي مبارك ! وحارجع لكم الفلوس اللي سرقتها ..يبقي ازى الحال بقي؟!.. حد يقدر يرفض؟!.. مش اصول العدل والمساواة:إن اللي يمشي علي مواطن يمشي علي بقية المواطنين؟!.. 
إفرض بقي!! إن اللص أو الموظف المختلس ده عمل 100 عملية قبل كده!! ومااتمسكش أو ما اكتشفناش إلا آخر عملية بس ..الليهو رجع فلوسها  وإحنا سامحناه  عليها.. وبسلامته هرب أول ما اخد صك العفو والغفران والسماح ..قبل مايتحقق معاااااااااااااه.. ونكتشف باقي العمليات.. ويتحاسب عليهم .. وصاحبنا هرب بفلوس الـ99 عملية  علي أي دولة م اللي مافيهومش إتفاقيات لتسليم المجرمين.. يبقي ازي الحال بقي؟!!.. وأخينا قاعد في البلد دي يتمتع بالفلوس اللي هو سارقها ويطلع لنا لسانه؟!!
قيس بقي سعادتك علي حوار الحرامي أبو 100 عملية ده ـ  وحط في دماغك إن مافيش حرامي عنده ضمير أصلا.. ماهو لو عنده ضمير كان خاف من ربنا وماكنش سرق.ـ
وأسأل نفسك بقي: إيه اللي يضمن لنا إن لو مبارك حرامي فعلا وسرق الفلوس ..إنه يقولنا ويكشف لنا كل الحسابات والأرصدة؟!!
مش ممكن يعمل زي زميله في المهنة (صاحب الـ100 عملية) ويكشف لنا رصيد واحد بس أو حتى 10 ويخفي الـ99 أو الـ90 الباقيين.. ويطلع يتمتع بيهم مع أخينا التاني ده في دولة من إياهم ويطلع لنا لسانه ويغيظ فينا هو كماااااان..

وخد بال سعادتك..!! إن كل (الحرامية) اللي في المزرعة مستنيين الخطوة دي تحصل عشان يطالبوا إنهم يتعاملوا بالمثل..
ويرموا لنا كام مليون .. ويطلعوا يتمتعوا بالمليارات .. ويطلعوا لنا لسانهم ويغيظونا هم كماااااان.. وارجع سعادتك  بالذاكرة كده لعرض أحمد عز في بداية المحاكماااااااااااات!!

... ... ...
والأهم بقي من ده كله!!
وبعيدا عن حوار الفلوس والممتلكات ده..
خلينا نطرح..
سؤاااال:
هل جريمة مبارك هي السرقة وبس؟!!..
يعنى مشكلتنا معاه إنه حرامي.. وممكن يرد الفلوس اللي سرقها ونسامحه وعفا الله عما سلف؟!!..
والإجاااابة:
 إن جريمة مبارك  عمرها ماكانت السرقة وبس..!!
السرقة والحسابات دي اكتشفناها بالصدفة !! والناس بتدور وتنخور وراه عشان تحاكمه علي جرايم  ومصايب 30 سنة .. كان معيش فيهم الشعب في قهر وذل وظلم وجهل.. سرطن عيشة الناس وموتهم بالبطئ وساب الديابة والكلاب اللي حواليه ينهشوا في الشعب ويثروا ويكبروا علي حساب الغلابة والبسطاء واللي ماكنش بيفوت مناسبه الا ويقول انهم هدفه.. طبعا هدفه عشان يخلص عليهم ويبيدهم ويخلص منهم..
جريمة مبارك  ماهياش سرقة وبس!! إنما دي سلسلة طوييييييلة من الجرايم علي كل شكل ولون..
أخرها بس!!  علي سبيل المثال لا الحصر جريمة قتل الشهداء أيام الثورة..

يعنى حتى لو أتنازل عن الفلوس اللي لهفها وحصل صلح في جريمة السرقة...
لازم يتحاكم علي بقية الجرايم..

... ... ...
الخلاصة في موضوع الاعتذار ورد الفلوس ده:

أنا شايف إن مبارك يخضع لمحاكمة عادلة ونزهية مافيهاش اي شبهة مجاملة او ظلم..

ولو المحاكمة أثبتت انه برئ والفلوس بتاعته يبقي خلااااص. حلال عليه.. !وحرام علينا..!
ويبقي هو احتفظ بفلوسه ..واحنا ما اخدناش فلوس حرام مش من حقنا..
أما بقي لو لو ثبت انه مذنب..!!
يبقي القانون يقول كلمته.. واللي يمشي علي أي حد في جريمة زي دي يمشي عليه..!
وطبيعي لو هو مذنب و الفلوس مش بتاعته .. إنه يرد الفلوس لأصحابها..

وكده لايبقي الشعب إتظلم ولامبارك نفسه إتظلم..!
وأظن إن مبدأ العدل والمساواة امام القانون بيقول كده..!
... ... ... ... ... ... ... ... ...
ملحوظة اخيـــــــرة:
"أنا مبسوط ومظقطط آخر ظقططة.. م الحمار !! أو مجموعة الحمير (وربنا يحفظهم  لمبااااااارك يارب ويطول لنا في ودانهم كمان وكمان ومايحرمناش من غباءهم ابدا ابدا):
مبسوط منهم عشان! اقترحوا علي مبارك إنه يطلع يقول كلمة يعتذر فيها للشعب ويقول إن عنده إستعداد يتنازل عن الفلوس والممتلكات..

ولازم كلنا نجهز نفسنا من دلوقت ونستنى الكلمة دي علي أحر م الجمر..وأول ما الكلمة تتذاع نسجلها وننسخها علي سيديهات ماركة مرتضي منصور..! لأن الكلمة دي حاتكون أول مستند بل أهم  مستند في ملف قضية فساد مبارك..لأن إعتذاره معناه!! اعتراف منه انه إرتكب جريمة تستحق الإعتذار ..وتنازله عن الفلوس مالهوش غير معنى واحد وهو ان الفلوس مش بتاعته..وانه فعلا سارقها وبيرجعها لأصحابها..والأهم من كده بقي إن الكلمة دي حاتكون أكبر دليل علي إن مبارك كداب..وكل اللي قاله في التسجيل الأولانى اللي أذاعته العربية  كدب × كدب..
خاصة إنه كان بيقول في التسجيل إنه لايملك اي حسابات أو أرصدة في الخارج وكل حساباته معروفة..
مش كده وبس دا كان بيهدد ويتوعد إنه حايلاحق كل من تعمد النيل منه ومن سمعته !!

 الله يرحمك ياسُمعـه !!!

أبوذكري
17 / 5 / 2011

مرشح البقرة..ودكر البط!!

لحد وقت قريب كنت عاقد العزم ومبيت النية علي أنى أنتخب الدكتور البرادعي رئيسا للجمهورية..
لكن بعد ماشفت فيديو الضاكطور توفيك عوكاشة اللي بيحدد فيه شروط مهمة وضرورية ولازمة لأى مرشح رئاسي وبيوجه أسئلة مفحمة للدكتور البرادعي ..أفقت م الوهم اللي كنت فيه ده وقررت أستمع لصوت العجل* وأعطي صوتى للمرشح الفحل* اللي  يستاهله و العجل ده .. قصدي المرشح ده هو :الضاكطور عوكاشة...
 وقراري كان للأسباب التالية:


  • في الوقت اللي الدكتور البرادعي..كان مضيع وقته فى وكالة الطاقة الذرية،.وعمال يجتمع مع الرؤساء ويتسرمح بين الدول..ولحد لما رجع مصر بخفي حنين وجايزة نوبل، وماكانش لاقي له شغلانة وقام عمل جمعية وطنية للتغيير ، وقعد يضيع وقته في السياسة، ويعارض في النظام ويرخم عليه.. لحد ماحصلت الثورة وضيع البلد .!. وعشان ينبسطوا بتوع التحرير.!.
  • كااان الضاكطور توفيك عوكاشة.. قاعد يدرس في البراغيت، ويلف علي أسواق المواشي ويسأل كل بقرة ايه اللي موقفها في السوق؟!!.. ودفعت (بركة) كام عشان تقف؟!! (الله اكبر!! الراجل بيعرف  يتحاور مع البقر.. يعنى متعلم ومعاه لغات اهه)..!
....
  • مش كده وبس!!
إنما الضاكطور توفيك ماكنش بيضيع وقت ابداً ـ علي عكس الدكتور البرادعي طبعا ـ وكان توفيك (مع الاحتفاظ بالألقاب طبعا).. بيقعد جنب الحاجة وهي بتظغط الطيور .. عشان يتعلم منها دكر البط بيتظغط إزاي؟!!..لحد ماأتقن "سياسة التظغيط" وتمكن منها وفهم كل خباياها وأسرارها.. ووصلت براعته  لأنه بقي ممكن يعرف لو الدكر اتظغط "فول" يبقي ايه؟!! ولو اتظغط "درة" يبقي ايه؟!!..!
...
  • طب سيبك من حوار التظغيط ده وحانعتبره سياسة داخلية أمرها هين ممكن يقوم بها اي وزير او مستشار رئاسي.... 
و تعالي سعادتك بقي للسياسة الخارجية والعلاقات الدولية اللي علي أعلي مستوي!!
وخلينا نتخيل مع بعض كده!! لـو الرئيس بتاعنا في زيارة لأمريكا..! وقامت في دماغ الرئيس الأمريكانى إنه ياخده زيارة لسوق المواشي بتاع تكساس..! ووقفوا قدام بقرة م اللي في السوق..! والرئيس الأمريكاني سأل الرئيس بتاعنا عن بركة البقرة = تمن وقفتها في السوق ..تطلع كام؟!!. والرئيس بتاعنا إحتاس ومعرفش!!.. منظره يبقي عامل ازاي قدام البقرة؟!!.. هـا ؟!! يبقي عامل ازاي؟!!طب بلاش منظره هـو !! إحنا ..مصر.. ايحيبت.. المصريين .. الايجيبشنز (هاي.. هاي) ..!! منظرنا يبقي عامل ازاي قدام البهايم ؟!! .. هـا ؟!! .. يبقي عامل ازااااي؟!!..
....
  • وبعد ده كله!!
عايزينى انتخب الدكتور البرادعي رئيسا للجمهورية.. وهو لايفقه اي شئ في سياسة التظغيط.. وماعندهوش اي خلفية عن بركة البقرة وبتدفع كام ؟!! عشان تقف في السوق..
واسيب المرشح المصري الأصيل الفلاح ابن الــ. ... توفيك عوكاشة..
ياخي a>>a..
أبوذكري
15 / 5/ 2011
فرحان قوي بنوبل بتاعتك دي؟!! وعايز تبقي ريس!! وفاكرها بالساهل كده؟!!جاوب بقي ع الأسئلة دي :
1- ده بيتظغط ازاااااي؟!!
هـا؟ ازااي؟!!

بالذمة ده وقته..في وسط الأسئلة كده..!!
امرنا لله..!!
استنى .! اما ينف ويقرفنا..!
نرجع تاني للأسئلة:
2- البركة دي دفعت كام عشان تقف الوقفة دي؟!!
كااااااام؟!!
الله يكسفه!! بيعمل ايه ده؟!!
استني ماتجاوبش!! مش هو ده السؤال..
السؤال:3- تعرف تبوس كده؟!!..
ايه اللي جاب ده هنا؟!!!..البتاع ده مش في الأسئلة!!
أكيد دسيسة.. وتبع الجدع اللي بينف ده!!

بلاااااش ظلم!!

الناس الظالمة اللي بيكدبوا الأخبار عن إن صحة مبارك لاتسمح بنقله للسجن!!
  ومش مصدقين الأخبار عن تجهيز سوزان لعملية في القلب وإن صحتها برضه لاتسمح لنقلها للقناطر!!
ـ دا وصل بهم الجحود والجبروت ومطلعين ع الست الكُمل أوشاااعة إن ماعندهاااش قلب أصلا ! عشان تعمل فيه عملية :))
حرام عليكم بقي!!.
حرام بجد!
بتكذبوا الأخبار علي أي اساس؟!!
هـا؟.. علي أي اساس؟!!..
حد منكم خرج من يده يزورهم في المستشفي اللي هم فيها ..ويتأكد بنفسه.. وبالمرة يطمن عليهم-
ياشعب جاحد ماكانتش عشرة 30 سنة دي ابداً؟!..
طـب معاكم تسجيل فيديو ولا صور حديثة لهم؟!!..هـا..
لكم حد جوه المسشفشق* اللي هم فيها شافهم؟!! وعرفتم منه إن الكلام كدب مش حقيقة؟!!..هــا..
شكلكم وحش قوووي!!
شكلكم وحش بجد!!..
طب بلاش كده..
معاكم التقارير بتاعة حالتهم؟!!.. هـا..
واصلا..اصلا.. لو معاكم التقارير..هو انتم اصلا..دكاترة.. اصلا..
وتقدروا تفهموا اللي في التقارير؟!! هـا..
بلاش بقي الكلام ده.. عيب!
عيب وحرام بقي !.
حرام بقي وعيب !.
شوية ثكة بقي*.. 
شوية دقة..
شوية طورشي !!
وبلاش ظلم..
ياعااااااالم يــا...

أبوذكري
15/5 /2011